#1  
قديم 07-31-2009, 11:53 PM
الصورة الرمزية lite2009
lite2009 lite2009 غير متواجد حالياً
 
تاريخ التسجيل: Jan 2009
الدولة: مــــــــــــــــــصـــــــــــــــــــــر
العمر: 20
المشاركات: 1,370
افتراضي 35 فكرة و نصيحة علشان تقضي صيف مثالـــي !!!!

بسم الله الرحمن الرحيم
السلام عليكم و رحمة الله و بركاته

أقدم لكم ..

35 فكرة و نصيحة علشان تقضي صيف مثالى ..

===========
===========

يوليو يعنى صيف و حر شديد ، بس برضه يعنى مصيف و سفر و أجازة ..،، و عشان المصيف و الأجازة و السفر يبقوا ممتعين و مثاليين ..

أنا بأقدم ليكم 35 فكرة و نصيحة عشان المصيف يبقى 10/10 ..

و الأفكار اللى هاقدمها ليكم موفرة و ممتعة و صحية ..

و طبعاً متنساش تاخد الكاميرا بتاعتك عشان تسجل و تصور أجمل اللحظات اللى هتقضيها ..

===========
===========

(مواصلات)

1-خد الأوتوبيس من آخر الخط .
الأتوبيس ممتاز جداً فى السفر لما يمسك السكة لبره القاهرة ،، لكن مشكلته فى المحطات الكتير اللى جوه القاهرة نفسها ..
لتوفير الوقت و تعب الإنتظار فى الكراسى الصغيرة الضيقة اللى فى المحطات ..
اركب الأوتوبيس فى آخر رحلة و محطة له فى القاهرة .
لو كنت رايح الساحل الشمالى أو اسكندرية .. يبقى اركب الأوتوبيس من ميدان الرماية أحسن حاجة .. و ممكن برضه تركب من عند هيلتون رمسيس أو موقف الترجمان لو عايز تتجنب شارع الهرم ..
لو رايح الإسماعيلية اركب من موقف ألماظة .. و لو رايح اسكندرية زراعى يبقى اركب من موقف عبود ..

2-اقعد ورا السواق .
لأصحاب السيقان الطويلة ، أفضل كرسى تحجزه هو اللى ورا السواق من ناحية الباب ..
أما إذا كنت تُصاب بالغثيان ،، يبقى أحسن مكان ليك هو نص الأوتوبيس عشان تبقى بعيد عن أثر المطبات ..

3-ابعد عن الميكروباص و البيجو .
السيارات البيجو و الميكروباص فى السفر هم الإختيار الأسوأ على الإطلاق(قعدة غير مريحة - زنقة - كتمة - حر - تعامل سيئ مع السواق) .. الحل الأمثل ليك هو القطار أو الأوتوبيس ..

4-شارك فى العربية .
لو كنت مسافر بالعربية و فى مكان فاضى ، لو عايز توفر بنزين العربية .. علق إعلان فى المكان اللى بتشتغل فيه (هتسافر امتى و فين و ازاى و ايه الطريق) و مين عارف يمكن تلاقى حد معاك ..
الطريقة دى على فكرة مش بس موفرة .. كمان العربية بتكون مستقرة أكتر فى السفر ،، و كمان ممكن تبدل فى السواقة عشان تستريح بس لازم اللى تبدل معاه ده يكون طبعاً معاه رخص و بيعرف يسوق ..

===========
===========

(نشاطات)

5-شوف في كام "بشبيشي" ؟!
لسبب غريب و مجهول ، كل محلات الحلويات اللى على طريق اسكندرية الزراعى اسمها "البشبيشي" ،، جرب كده و عد كام "بشبيشي" فى الطريق على سبيل التسلية .. بس متكونش انت اللى بتسوق ..

6-العب رياضة .
انتشرت بطريقة ملحوظة ملاعب كرة القدم الخماسية .. و أسعارها مختلفة و حسب إمكانياتك .. ممكن تحجز مع أصحابك ملعب نجيلة بحوالى 150 جنيه للساعة .. و فى ملاعب عادية مش نجيلة فى مراكز الشباب و هتلاقى الساعة فيها بحوالى 30 جنيه ..

7-استمتع بالـ"ريست" .
ممكن تكون مش محتاج تشترى أى حاجة من الريست ،، و لكن الريست هو فرصة جميلة و جيدة للإستراحة من القيادة .
بس خد بالك .. لازم تختار ريست كويس عشان تستمتع و تستريح ،، و لو انت رايح اسكندرية زراعى يبقى عندك فرصة تعدي على طنطا تشترى منها حلويات .

8-روح سينما صيفى .
عشان ظروف الإنفلونزا و الطاعون و الحمى القلاعية و الأمراض المعدية اللى دايرة فى البلد اليومين دول .. يبقى السينما الصيفي فرصة ممتازة إنك تبعد عن القلق خصوصاً أنها مفتوحة يعنى الهوا اللى فيها متجدد دايماً ..
و ممكن تشوف كل الأفلام اللى نفسك تشوفها فى أى سينما صيفى و بتبقى أرخص من السينمات التانية اللى فى القاهرة .

===========
===========

(تسوق)

9-شنط إسكندرية .
لسبب مجهول ، شنط الإسكندرية الحريمي أجمل و أرخص من القاهرة ،، احرص على نزول وسط البلد بالإسكندرية و اشتري شنطة (فى موقف لطيف لزوجتك) .. و متخافش لأن سعرها هيبقى مناسب جداً .

10-اشترى من المصيف .
لو قررت انك تصيف فى أمكان زى (اسكندرية - بورسعيد - مرسى مطروح - الإسماعيلية) .. أحسن ليك أنك تشتري من هناك ملابس المصيف و الصيف ،، لأن أسعارها بتكون كويسة جداً .. و خصوصاً انك طبعاً مش محتاج توكيل عالمى عشان تشترى شورت أو تيشيرت أو بنتاكور .. محلات بواقى التصدير هتسد مكان كل ده .

11-عدى على سوبر ماركت .
"عايز آكل" ، "عايز أشرب" ، "عايز أخش الحمام" .. كلها شكاوى ممكن تعكر صفو الرحلة و انت فى الطريق .. تجنب كل شكاوى أطفالك من النوع ده .. و عدي على أى سوبر ماركت و أكلهم و شربهم و متنساش تدخلهم الحمام ..

12-اشترى من على الطريق .
بدل ماتشيل أكل الأسبوع كله من البيت .. اشترى الخضار و الفاكهة و أنت فى الطريق ،، و يا سلام لو انت رايح اسكندرية صحراوى ساعتها ممكن تقف عند برج العرب أو مزارع دينا و تجيب كل حاجة .

13-مج بورسعيدي !!
لسبب مجهول (زى شنط الإسكندرية) .. لن تعرف لماذا تملك بورسعيد مجموعات و تشكيلات مختلفة للمجات ، كل الألوان و كل الأحجام تقريباً .. و المفاجأة انها بتبقى رخيصة جداً .. لو روحت بورسعيد ابقى شوف المجات و ابقى قوللى رأيك ..

===========
===========

(أكل و شرب)

14-جرب مشويات "بلبع" .
فى حد يروح اسكندرية و مايسمعش عن بلبع ؟؟
جرب مشويات بلبع اللى فى تاون سيتي فى مدخل اسكندرية الصحراوى .. ممكن توصله من العجمى بالطريق الدائري ،، و الخدمة هناك أحسن من بلبع اللى فى سيدي بشر .. و كمان هتبعد عن الزحمة الضخمة اللى فى خالد بن الوليد .

15-وفر تمن كرتونة مياه معدنية .
أياً كان المكان اللى انت هتسافر فيه تجنب شرب مياه الحنفية (لأنها غالباً بتكون مياه خزانات السطح و أحياناً بتكون الخزانات خربانة و بتلوث المياه اللى جواها) ،، فبدل ما تشتري مياه معدنية ،، حاول بقدر الإمكان انك تاخد معاك فلتر تنقية المياه .. ده بدل ماتشتري كرتونة مياه معدنية ..
أو اعمل حسابك من قبل ماتسافر و املأ قزايز مياه على قد حاجتك و مدة الأيام اللى انت هتقعدها فى المصيف .

16-السمك الإسكندرانى .
اسكندرية من غير سمك متبقاش اسكندرية ،، لازم تروح أى مطعك من المطاعم المشهورة هناك ،، بس عشان الميزانية متخربش ابعد عن الجمبري و الاستاكوزا و كل الأسماك المكلفة ..
و خليك مع البورى و البلطى و السبيط ،، و يُفضل انه يكون مشوى لأن المقلى بيزود من حرارة الجسم و الجو حر أساساً و احنا مش ناقصين .

17-استخدم الأيس بوكس .
ممكن تاخد معاك و انت رايح المصيف شوية أكلات مجمدة أو معلبة من البيت و تحطها فى الأيس بوكس عشان يحفظ درجة حرارتها .. و بكده هتوفرتمن شراءك كل الوجبات من المطاعم ..

18-علب التونة .
خد معاك علبتين أو 3 علب تونة .. التونة ممكن تاكلها غداء و عشاء .. و ممكن لما ولادك يخرجوا من البحر تعملهم سندويتشات تونة على لما تروحوا تتغدوا ..

19-العيش البلدى .
لو كنت من سكان القاهرة و مسافر الساحل الشمالى أو اسكندرية و بتحب العيش البلدى يبقى لازم من الأول تشترى عيش بلدى من القاهرة .. لأن فى الساحل أو اسكندرية مش هتلاقى غير العيش الشامى (غالباً) .. و عموماً أياً كان المكان اللى انت رايحه خد العيش من الأول عشان متروحش هناك و تتعذب فى طوابير العيش و تضيع عليك متعة المصيف .

===========
===========

(احطياطات أمنية)

20-أدوية احطياطي .
فى أى مكان تصيف فيه خلى معاك كيس صغير فى أدوية للأمراض المُحتمل الإصابة بيها فى المصيف زى (البرد و الصداع و الزكام) و متنساش كريم بشرة لحمياتها من الشمس و الحروق .

21-إبرة و بكرة خياطة .
خد معاك إبرة و بكرة خياطة بس يكون لونها شائع زى (الأبيض - الأسود) .. لأن انت متعرفش يمكن يتقطع منك زرار أو سوستة تبوظ ..

22-الناموس .
فى المصيف بيبقى الناموس كتير أوى ،، فانت تعمل حسابك و تاخد معاك أى حاجة طاردة للناموس .

===========
===========

(على الصحراوى)

23-استريح فى الغابة .
بالنسبة للمصيفين اللى جايين من الصعيد و رايحين اسكندرية ، السكة بتبقى طويلة جداً و خصوصاً و انت راجع .. ليه متجربش تكسر المشقة و تبات و لو ليلة واحدة فى واحد من موتيلات الصحراوى .. و من أحسن الموتيلات دى موتيل "أفريكانو" اللى هو قبل اسكندرية بحوالى 70-80 كيلومتر .. و لو عايز توفر فلوس ممكن تبات فى موتيل "الحمرا" فى وادى النطرون و تتمتع فيه بجو الرف الأصلى .. و لو نفسك فى فطير مشلتت بالسمن البلدى يبقى اطلع على "واحة عمر" .

24-اطلع برج العرب .
و انت رايح "سيدي كرير" فى الساحل الشمالى ، بتاخد طريقبرج العرب من الصحراوى و الطريق ده رائع عشان بيعدى بين بحيرات مالحة جميلة .. و ممكن تركن على جنب تستريح شوية من السواقة .. و ممكن بقى لو معاك سنارة تنزل تصطاد ..

25-جرايد و قماش .
على الطريق الصحراوى مفيش شجر يقلل من آشعة الشمس و يخففها و يحميك من الحرارة .. و حتى لو كنت مسافر فى أوتوبيس مكيف ،، لأن ضوء الشمس فى الصحراء ساطع جداً و مفيش حاجة تحميك منه .. طب و ايه العمل ؟؟
خد معاك من الأول كام جرنان قديم أو كام حتة قماش و ثبتها فى الشبابيك من فوق .. و بكده الجرنان أو القماشة دي هتمنع بقدر الإمكان انها تدخلك ضوء الشمس .. فتخلى اللى عايز ينام ينام ماعدا اللى بيسوق طبعاً ..

===========
===========

(تخاريم)

26-ابعد عن محور 26 يوليو .
و انت راجع من اسكندرية ، ابعد عن وقفة المحور ، و كمل طوالى لغاية ميدان الرماية و ميدان الرماية ده دلوقتى بقى أحسن بعد التطوير .. و ممكن تتطلع منه على دائرى المعادى أو تدخل يمين لطريق 6 أكتوبر و خد طريق الواحات شمالك و اطلع على الدائرى .. و حمدلله على السلامة ..

27-الإسماعيلية زراعى .
لو انت من سكان شمال القاهرة ، أسرع ليك انك تروح الإسماعيلية بالطريق الزراعى .. تاخده من آخر شارع السواح و تتطلع كوبرى السواح (ممكن تشترى كل مستلزمات الرحلة من خضار و فاكهة من على الطريق) ..طريق الإسماعيلية بيكون زحمة شوية لحد العاشر من رمضان و بداية الطريق فى جسر السويس بتكون ضيقة شوية ..

===========
===========

(مواعيد)

28-جرب رمضان !!
السنة دى طبعاً موسم المصيف هيبقى مضغوط جداً بسبب ان شهر رمضان فى يوم 22 فى شهر 8 .. و إحنا المصريين مش بنحب السفر فى رمضان لأنه بيبقى مُتعب شوية ... بس نلاحظ ان وقت الصيام هيكون طويل شوية و النهار هيكون أطول .. فليه منجربش نصيف فى رمضان بس تتنازل عن الوجبات الخفيفة اللى بتاكلها على البحر .

29-ضبط ميعاد حجز الفندق .
لو ناوى تصيف فى فندق ، ضبط نفسك ان موعد وصولك يبقى مش قبل الساعة 12 ظهراً .. ده معاد استلام الغرف فى العالم كله مش فى مصر بس .. لو وصلت قبل الساعة 12 ، غالباً الغرفة مش هتبقى جاهزة لاستقبالك ..

30-اهرب من منخفض الهند !
ممكن نختلف كتير فى أكتر وقت بيكون حر فى مصر ، بخلاف ان ده يعتمد على مكان اقامتك و الزحمة ،، أعلى درجات الحرارة ممكن تلاقيها فى القاهرة و المناطق الشمالية و ده غالباً فى شهر 8 ..
بس المشكلة غالباً بتبقى فى الرطوبة بسبب منخفض الهند الموسمى اللى يبدأ فى شهر يونيو و يستمر معظم شهر يوليو و بيقل شوية صغيرين فى أغسطس ..
طيب .. لو عايز تهرب من أكبر كمية عرق بسبب الرطوبة .. يبقى تسافر إلى الشَمَال فى شهر يوليو .. و لاحظ ان جنوب سيناء و الإسماعيلية و العين السخنة بتزيد فيهم نسبة الرطوبة فى شهرى يوليو و أغسطس .

31-إياك يوم السبت !!!!!!!
اوعى ، اوعى ، اوعى ترجع من اسكندرية ولا الساحل الشمالى يوم السبت ، لأن معظم الناس بتبقى راجعة فى الوقت ده ،، و مش عايز أقول زحمة المحور شكلها هيبقى عامل ازاى .. فشوف يوم تانى غير السبت ترجع فيه

===========
===========

(المصيف)

32-جرب جمصة و رأس البر و بلطيم .
أماكن كتير اتجددت فى الفترة الأخيرة و لو شفتها مش هتعرفها و من أمثلة الأماكن دى (جمصة - رأس البر - بلطيم) ،، و الأماكن دى تقدر تقضي فيها مصيف غير مكلف .

33-شرم الشيخ و الغردقة .
أسعار الإيجار فى شرم الشيخ و الغردقة تتراوح ما بين 250-350 جنيه فى اليوم ، و ده بيعتمد على مكان الشقة و مدى قربها من البحر ..
لو مش عايز تأجر خالص و نفسك تقضى فى فندق فى شرم الشيخ فمتوسط أسعار الفنادق الـ4 نجوم بيكون حوالى 450 جنيه للفرد الواحد فى اليوم ..

34-اسكندرية و المعمورة .
لو نفسك تقضى اجازتك فى اسكندرية لليلة أو ليلتين و تأجر شقة .. فمتوسط سعر الإيجار للشقق اللى تشوف منها البحر 400 جنيه فى الليلة و ده مثلاً فى منطقة طابية سيدي بشر ، و تقدر تلاقى شقق بأسعار أقل كلما بعدت عن البحر .. و نفس الكلام ده كله فى المعمورة ..

35-قضي ليلة مجاناً فى هيلتون بيراميدز جولف .
قضي 3 ليالي متتالية فى منتجع هيلتون بيراميدز جولف .. و احصل على الليلة الرابعة مجاناً !!
العرض ده متاح من 18 يونيو لحد 16 أغسطس 2009
منقووول
__________________

مارد وشوشني و اوشوشك


Back again
رد مع اقتباس
  #2  
قديم 08-01-2009, 12:03 AM
Redeye Ninja Redeye Ninja غير متواجد حالياً
مشرف سابق
 
تاريخ التسجيل: Oct 2008
الدولة: مـــــــ Egypt ـــــصر
المشاركات: 7,057
افتراضي رد: 35 فكرة و نصيحة علشان تقضي صيف مثالـــي !!!!

ياعم ده للي بيسافروا

هههههههههههههههههههههه
رد مع اقتباس
إضافة رد
اشترك في القائمة البريدية لموبايل فور اوول ليصلك كل جديد

بريدك الالكتروني


أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
الهكسوس دخلوا مصر علشان احمد عرابي معندوش رصيد!! abdullah90 منتدى التسلية و الترفيه 6 11-27-2009 12:22 AM
علشان كده حنا عايشين....لماذ نعيش؟ سمارة الزملكاوى القسم العام 4 05-07-2009 09:19 PM
محكمة جنح المحلة تقضى بحبس لاعب طلائع الجيش محسن هنداوى ستة أشهر ana ahlawy قسم كرة القدم العربية 0 02-06-2009 12:21 PM
علشان خاطرك يا حوده .. صور الفندق الفخم وروعة الاقامة .... تذكر شادي وتريكة بأيام جروا ana ahlawy قسم كرة القدم العربية 2 12-07-2008 03:38 PM
نصيحة قبل ان تحب 00بقلم صمت الجبال00 صمت الجبال قسم الشعر والشعراء 4 11-10-2008 09:34 PM



عنا

موقع ومنتدى موبايل فور اوول تم انشائه في عام 2007 بهدف التواصل مع المهتمين بعالم التكنولوجيا والموبايل والبرامج والتطبيقات الخاصة بالموبايل والكمبيوتر, وخلال هذه الفترة استطعنا خدمة مئات الألاف من الزوار والاعضاء ونسعى خلال الفترة الحالية الى تقديم الجديد في هذا المجال وزيادة التواصل مع زوار وأعضاء المنتدى الكرام

عنا


الساعة الآن 06:27 PM بتوقيت مسقط